This is an example of a HTML caption with link themeforest.net.

Җиңүчеләр сафында

Минем әтиемнең бабасы – Нурулла углы Фәйзулла Әпсәләмов Самар өлкәсенең Камышлы районы Татар Байтуганы авылында күп балалы ярлы крәстиән гаиләсендә икенче бала булып дөньяга килә. Әтисе бик иртә үлеп киткәнгә, бу гаиләгә яшәү бик авыр була. Шуңа карт бабам шул елларда авылда оешкан күмәк хуҗалыкта бик тырышып эшләп, әнисенә ярдәм итә.

1940 елның ноябрендә аны Кызыл армия сафларына алалар һәм Ерак Көнчыгышка, Манчжурия белән безнең илебез арасындагы чиккә, 102нче чик полкына хезмәт итәргә җибәрәләр. Бу Советлар Союзы иминлегенә Япония янаган вакыт була. Тик Ерак Көнчыгыштан көтелгән афәт безгә көнбатыштан килә. 1941нче елның 22 июнендә фашистлар Германиясе безнең илебезгә каршы сугыш башлый. Минем Фәйзулла бабамны да, кичәге чик сакчысын, Көнбатыш фронтка күчерәләр.

Шулай итеп, 1941нче елның көзендә ул Суворов орденлы Уралда оешкан 175нче дивизиягә кергән 120нче батареяда миномётчик итеп билгеләнә. Аларның шушы дивизия сугышчылары төялгән тимер юл составлары Куйбышев тимер юл станциясендә тукталыш ясый. Шуңа фронтка китүче бу дивизия 1941 елның 7нче ноябрендә Бөек Октябрь бәйрәме хөрмәтенә Куйбышев шәһәрендәге Куйбышев мәйданында үткәрелгән хәрби парадта катнаша.

Тиздән парадта катнашкан сугышчыларга кулларына корал тотып, Мәскәү юнәлешендә башкалабызга ыргылучы немец илбасарларына каршы көрәшергә туры килә. Бабам да бу бәрелешләрдә беренче тапкыр сугыш чирканчыгы ала. Менә шул вакыттан алып, алар дошманны көнбатышка таба куа башлыйлар һәм Смоленскига кадәр барып җитәләр. Шәһәрне дошманнардан азат иткәндә күрсәткән батырлыгы өчен ул “За отвагу” медале белән бүләкләнә. Тик “Батыр ярасыз булмый”, диләр халыкта. Атакага барганда, ул яралана һәм Кострома шәһәрендәге госпитальгә эләгә. Анда хәрби табиблар Фәйзулла Әпсәләмовны аякка бастыргач, ул яңадан фронтка китә.

1943нче елның җәендә язмыш аны Курск тирәсендә барган сугыш кырларына китерә. “Курская дуга” дип аталган мәхшәр җире була ул. Прохоровка авылы янындагы совет һәм немец танклары бәрелешендә миномётчик буларак катнаша ул. Аларның дивизиясе үзләреннән күп тапкырга көчле булган дошман һөҗүменә каршы тора, соңрак хәтта үзләре дә контратакага күтәреләләр. Шушы бәрелештә үзен кыю солдат итеп күрсәткән Әпсәләмовка командиры Дан ордены тапшыра. Бу сугышта ул икенче тапкыр каты яралана. Госпитальдән терелеп чыккач, аңа яңадан үзенең частен куып җитәргә туры килә. Ә полкташлары бик еракка, хәтта безнең көнбатыш чикләребезгә кадәр үк барып җиткән булалар. Сугышчыларга юлда биек тауларга менәргә, шаулап аккан Днепр, Буг, Висла елгаларын, салларга яки понтоннарга утырып, кичәргә туры килә. Висланы кичкәч, алар фашистларны Польшаның башкаласы Варшавага кадәр куып баралар. 1945нче елның 17 январендә Фәйзулла Әпсәләмов бу шәһәрне дошманнардан азат иткәне өчен “За освобождение Варшавы” дигән медальгә лаек була. (Ике тапкыр контузия алырга да өлгерә ул монда !)

Аның 120нче батареясы да кергән 1нче Белоруссия фронты сугышчылары шулай көрәшеп, Германиягә кадәр барып җитә. 1945нче елның апрелендә бу фронт башка фронтлар белән берлектә Германиянең башкаласы булган Берлинны чолгап ала. Бик каты барган канкойгыч сугыштан соң, ниһаять, фашист козгыннарының оясы булган Берлин шәһәре бирелә. Инде ефрейтор дәрәҗәсендә булган Фәйзулла бабам Берлиндагы Рейхстагны алуда күрсәткән батырлыгы өчен “Кызыл йолдыз” ордены һәм “ За взятие Берлина” дигән медаль белән бүләкләнә. Соңрак аңа “За Победу над Германией” дигән медаль дә тапшыралар. Шулай итеп, Җиңү көнен ул Берлинда каршылый.

Ә инде үзенең тиздән Мәскәүдә узачак Җиңү Парадында катнашачагын белгәч, аның күңелендәге бу шатлыклы хәбәргә сугышчан иптәшләрен югалтудан туган әрнү хисе килеп кушыла. 1945нче елның 24 июнендә илебезнең башкаласы – Мәскәүдә Кызыл мәйданда уздырылган Җиңү парады сафларында барганда да, җиңелгән фашист Германиясе армияләренең хәрби әләмнәрен Мавзолей янына ташлаганда да, ул боларның барысын да шушы иптәшләре өчен эшләвен аңлый.

1946нчы елда карт бабам туган якларына, инде ничә ел күрмәгән әнисе янына кайта. Ул гомер буе туган авылы – Байтуганда яши. Нинди эштә эшләсә дә, үзенең бөтен гомерен данлы хезмәткә багышлаган кеше ул.

Минем батыр, кыю Фәйзулла бабам 2009нчы елның 4 июнендә 88 яшендә туган авылында – Татар Байтуганында вафат була.

Фәйзулла бабам Әпсәләмов турында өлкәбездә чыккан “Книга памяти” дигән китапта да укырга мөмкин.

Самар шәһәрендә Җиңү паркында Бөек Ватан сугышында һәлак булганнарга стелла куелган. Аның янәшәсендә гранит такталар беркетелгән. Шушы такталарга Самардан һәм өлкәбездән 1945нче елның 24 июнендә Мәскәүдә Кызыл мәйданда уздырылган Җиңү парадында катнашкан якташларыбызның исемнәре уелган. Шулар арасында минем кадерле Фәйзулла бабамның фамилиясе дә бар.

Мин шундый бабамның оныгы булуыма һәм аның фамилиясен йөртүемә горурланам.

Самар шәһәренең

Яктылык” мәктәбен тәмамлаган

Альбина Әпсәләмова.

Хәбәрләр

Надежда Осипова: “Сез татар хатын-кызының асыл сыйфатларын пропагандалыйсыз”

Самарның Җәмигъ мәсҗидендә шәһәребезнең "Ак калфак" татар хатын- кызлары оешмасы корбан мәҗлесе уздырды. Хатын-кызларны Самар өлкәсе мөфтие Талип хәзрәт Яруллин сәламләде. "Корбан мәҗлесе, дуслык мәҗлесе җыйгансыз. Сезгә исәнлек, гаилә бәхете, тәүфыйк-һидәят телим. Шушы юлдан тайпылмыйча, мирасыбызны киләчәк буынга да тапшырырга насыйп булсын.

В Самарской области в 5-й раз отметят День дружбы народов

14 сентября 2019 года в Самарской области состоится празднование Дня дружбы народов. В этом году праздник, уже ставший традиционным и полюбившийся многим жителям Самарской области, пройдет в формате этнофестиваля «Все мы – Россия», отражающем современные взгляды, принципы и приоритеты в реализации государственной национальной политики. Организаторами праздника традиционно выступают Дом дружбы народов Самарской области и региональные национальные общественные организации при поддержке Правительства Самарской области.

Бер сыйныфта – алты алтын медальче!

Самарның “Яктылык” мәктәбендә чыгарылыш сыйныф укучылары белән очрашу узды. Җәй уртасы, инде бу вакытта нинди очрашулар, диярсез, бәлки. Ә менә бик шатлыклы очрашу иде бу. Югары уку йортларына кергән укучылар, үз сөенечләре белән уртаклашырга дип, туган мәктәпләренә, укытучылары янына килделәр. Әлеге сыйныф шунысы белән үзенчәлекле ки, унтугыз баладан алтысы мәктәпне алтын медальләргә тәмамлаганнар. Укучыларның барысы да диярлек, бердәм дәүләт имтиханнарында күп баллар җыеп, югары уку йортларына бюджет урыннарына кергәннәр.

Сентябрьнең 12ндә Вагыйз хәзрәт, имам буларак, Корбан бәйрәмендә беренче вәгазен сөйли

36 ел элек, 1983 елда, 49 яшендә, сентябрьнең берендә Вагыйз хәзрәт Яруллин Малый Тупик урамында урнашкан Самардагы бердәнбер мәсҗидтә имам булып эшли башлый. Шул ук елда, сентябрьнең 12ндә Вагыйз хәзрәт, имам буларак, Корбан бәйрәмендә беренче вәгазен сөйли.

1 из 165